Atalǵan kezdesý mártebeli qonaqtarǵa laıyqty sán-saltanatymen, qurmet qaraýyly sap túzep, eki memlekettiń ánurandarynyń oryndalýymen bastaldy.
Munan soń keńeıtilgen quramdaǵy kezdesýde Qazaqstan Prezıdenti naýryz aıynda Birikken Arab Ámirlikterine saparynyń sátti bolǵandyǵyn atap ótti. Memleket basshysy, sondaı-aq BAÁ-de sheıh Muhammed ben Zaıd Ál Nahaıannyń ákesiniń 100 jyldyǵy toılanyp jatqandyǵyna qaramastan, Qazaqstan Prezıdentiniń shaqyrtýyn qabyl alyp, Astanaǵa kelgendigi úshin rızashylyǵyn bildirdi.
Sonymen qatar Memleket basshysy Almaty men Astanada ótken qysqy Ýnıversıada oıyndaryna sheıh Mansurdyń, al Azııa oıyndaryna sheıh Muhammedtiń kelgendigin atap ótti.
– Men sizdiń ákeńiz, marqum ben Zaıdpen kezdesken edim. О́te kemeńger, meıirimdi adam edi. Biz ol kisi týraly kitap shyǵardyq, degen Memleket basshysy murager Hanzadaǵa ákesi sheıh Zaıd ben Sultan Ál Nahaıan jaıynda jazylǵan kitapty tabys etti.
Memleket basshysy sondaı-aq sheıh murager hanzadany «Astana – 20 jyl» mereıtoılyq medalimen marapattady.
– Siz ben meniń aramyzdaǵy týysqandyq, baýyrlastyq, jıi kezdesýlerdiń arqasynda eki eldiń arasyndaǵy bıznes, iskerlik qarym-qatynas ulǵaıyp kele jatyr. Saýda-sattyǵymyz eki ese artty. Aldymyzda kóp maqsat bar. Investısııany saqtaý týraly kelisimge qol qoıdyq. Qosarlanǵan salyq salýdy boldyrmaý máselesin kelistik, dedi Qazaqstan Prezıdenti.
Memleket basshysy sondaı-aq gıdroenergetıka jáne gaz-hımııa kesheni qurylysy salasyndaǵy jobalardy ári qaraı júzege asyrý máselelerine toqtaldy. Sonymen qatar Birikken Arab Ámirlikteriniń ǵylym men tehnologııany damytý jumystarynyń ózektiligine, oǵan qosa, eki memleket arasynda engizilgen vızasyz rejimniń tıimdiligine nazar aýdardy.
Qazaqstan Prezıdenti BAÁ qoldaýymen júzege asyrylyp jatqan áleýmettik jáne ınfraqurylymdyq jobalardyń júzege asyrylý barysyna da toqtalyp ótti.
О́z kezeginde Ábý-Dabıdiń murager hanzadasy sheıh Muhammed ben Zaıd Ál Nahaıan eki el basshylarynyń tyǵyz qarym-qatynastarynyń arqasynda Qazaqstan men Birikken Arab Ámirlikteriniń arasynda dostyq baılanystar ornaǵandyǵyn atap ótti.
– Sizdermen arada aǵaıyndyq qarym-qatynas qalyptasty. Biz Sizdi úlken aǵamyz dep esepteımiz jáne Sizdiń baı ómirlik tájirıbeńizdi qurmetteımiz. Osydan otyz jyl buryn Qazaqstan osyndaı ózgeristerdi júzege asyrady dep eshkim de kútpep edi. Búginde Qazaqstan – kóshbasshy el, aımaqtaǵy mańyzdy memleket. Osynyń barlyǵyna Sizdiń sarabdal saıasatyńyz ben kóregen kóshbasshylyǵyńyzdyń arqasynda qol jetkizildi, dedi murager hanzada.
Taq murageri resmı saparynyń qorytyndysy boıynsha birqatar ekijaqty qujatqa qol qoıyldy. Qazaqstan Respýblıkasy men Birikken Arab Ámirlikteri arasynda sottalǵan adamdardy berý týraly, mádenı saladaǵy yntymaqtastyq týraly jáne Aqparat jáne kommýnıkasııalar mınıstrligi men «Saýab» deradıkalızasııa jónindegi halyqaralyq ortalyǵy arasyndaǵy yntymaqtastyq týraly kelisimder bekitildi.
Resmı sapar aıasynda murager hanzada «Astana» halyqaralyq qarjy ortalyǵynyń ashylý rásimine qatysady dep kútilýde.
Serik ÁBDIBEK,
«Egemen Qazaqstan»
